ســلام يا صاحب قطعنا ولا زار

سلام يا صاحب قطعنا ولا زار"""وكل ما أزوره ولا يوم ألاقيه

زعلان مني والذي صار قد صار""والي جرا يا خوي وش حيلتي فيه

لو كنت مثلك أحسب كبار وصغار"""وأعد غلطاتك وكل ما تسويه

وافند أعذارك وافشي للأسرار"""وأجرح شعورك ما طرالي اداويه

وأنساك فترة ثم أجيلك بالأعذار"""مشغول..متواعد.. وظرفي أبديه

وأجلس معك ساعة وكأني على نار""من ساعتي أمشي وأخليك في تيه

وأجفاك مدة عامد وسبق اصرار"""وبعد الهجر ألقاك وأقول لبيه

أهديلك البسمه وأهديلك أزهار""وترى الهجر ياخوي ماني مواليه

وأجلس معك ساعة علوم وأخبار""وينتهي المجلس بلا شئ نحكيه

وأجفاك وأرجعلك وهالحال تكرار""هذي سواتك في فؤادي تعنيه

لكن صدري واسع لكل معذار"""ويصبر على هفوة خوي يخاويه

وان كانك اليوم تغيرت بادبار""والله لك ماضي وصعب تناسيه

والله يشهد ماضيك نور وانوار""وافي على مر الزمان ولياليه

أذكرك يا حر ومن نسل الأحرار""وكل حر واضح من مواريه

أذكر وعودك يوم تذكر لي مرار"""ان الزمن ما راح تسمع دعاويه

واليوم أشوفك ضعت في وسط الاعصار""يومين يلعبك ويوم تجاريه

أبكي على ماضيك والدمع مدرار""وحاضرك كم يشقي فؤادي ويبكيه

يوم أذكر الماضي وحاضرك أحتار""وأقول يا الله ياالهي تهنيه

ترا فؤادي يا حبيبي لكم دار""بالأمس ساكن به ولليوم راعيه

ومهما جرى منك يبو طبع غدار"""ماضيك مع قلبي عموما.....يواسيه