الشارع اللي فيه ناس وممرات
ماهمني من اوله من أخيره
لو كان به شيخات ولا اميرات
انا مااشوف أحد سواك أميره
بين السعوديات والاجنبيات
ماالله خلق لك بالوصايف خشيره
بالزين حطمتي جميع العلامات
عنقا .. غنوجه .. مستعفه .. صغيره
قدك رشف من غاية الطول رشفات
لا انتي طويله حيل ولا قصيره
يا ابعد من الهقوات واقرب من الذات
واصدق من احساس العشير لعشيره
يا سالفه ملا بدينا وما فات
يا عشق بن شداد وابو نويره
تفتحي على ضفاف البحيرات
وتنقلي فيهن بحيره بحيره
كوني كذا على صدور البنيات
كتمة نفس .. كوني كذا .. يا خطيره
انتي حسب ما روجته الاشاعات
مخلوقه .. لجل يموتون غيره
اسعد مساء بين كل المساءات
تعريضتك مثل المها المستديره
ياللي عليك تحدد الاولويات
مغيث مات من الجفا يا بريره
ابسالك يا ام العيون الوسيعات
اللي تولع فيك وش هو مصيره
تعبت وانا اطوي عليك المسافات
وويلاه من بعض الدروب العسيره
خوذي هواي بصمت واخذك بسكات
وتفائلي بالصمت .. والصمت خيره
الشاعر: ياسر التويجري
